Husi sorumutuk fó orientasaun klaru ba Polisia Tránzitu atu intensifika seguransa rodoviaria hodi regula no halo kontrola ba motorista sira ne’ebé viola lei kódigu estrada nian.

“Enkontru ida ohin ne’e ita foku liuba Seksaun Tránzitu Seguransa Rodoviaria PNTL hodi halo avaliasasaun sira hanesan prezensa polísia nian iha públiku, disiplina uza fardamentu, halo atendementu ho lalais, halo “refreshing training” ba membru tranzitu sira wainhira halo “check point” iha terenu inklui sensibiliza rezolusaun regra Estadu Emerjénsia no Serka Sanitária ne’ebé Governu dekreta ona hodi implementa”,  informa Segundu Komandante PNTL munisípiu Dili, Superintendente Polísia, Euclides da Costa Belo, segunda (21/06).

Tanba públiku sempre ezije ba figura lideransa ida di'ak hodi fó atendementu ba nesesidade ema hotu nian, tanba ne’e enkoraja membru sira atu mantein disiplina, rona orden husi komandante.

“Orientasaun komandu hato’o ba komandante sira no ba membru tomak tenke garante Dili hakmatek ba ema tomak, la bele iha ema ida impede ema seluk nia liberdade, ida ne’e labele akontese, tanba iha ita-nia konstituisaun artigu 44 nian garantia ema nia liberdade no seguransa. Maibé husu ba membru tomak, tenke mantein disiplina, tenke rona orden Komandante sira hodi intensifika halo kontrola ba motorista sira ne’ebe kontra kodigu Estrada nian”, dehan Euclides.

Maibé husu ba membru sira atu kuida no atensaun didi'ak iha atendementu loroloron nian, atualiza informasaun ba malu, liliu haree fali rezultadu nomós obstaklu sira ne’e ho efetivu. (*)