Tanba seidauk iha Prezidente foun hodi troka nia fatin, provizioriumente, deputadu L-7 mak asume kargu nu’udar Prezidente Komisaun B interinu hodi hein prosesu eleisaun ba Prezidente foun.
Aderito Hugo hatete, nia rejigna an hodi fó dalan ba aliansa ne’ebé mai ho kompromisiu foun atu viabiliza funsionamentu normal PN.
"To'o ohin ha’u mai loke reuniaun komisaun B nian iha ajenda mais proposta ba distituisaun seidauk iha, entaun ohin dader ha’u lidera komisaun ne'e hodi aproveita ha’u deklara antisipadamente tuir rejimentu ha’u rejigna husi pozisaun Prezidente hodi fó dalan ba proposta foun ba komisaun B nian," dehan Aderito iha PN, Kinta (04/06).
Nia dehan, hafoin rejigna aan, indika fali deputadu ne’ebé ho idade as liu atu lidera komisaun B.
"Ha’u lidera reuniaun ne'e to'o remata seidauk iha proposta, entaun hanesan rejimentu hatete kuandu Prezidente meza rezigna an ona indika fali deputadu mais idade ida mak Cornelio Gama "L7" atual Vise Prezidente komisaun B par tranzisaun ida ne'e nia lidera hela ate proposta ba kandidatu foun eleitu," dehan nia.
Aleinde ne’e, iha mós mudansa lideransa ba komisaun C trata asuntu asuntu Finansas Publikas ne’ebé molok ne’e lidera husi Fernanda Lay (CNRT) hetan subtituisaun husi Maria Angelica (FRETILIN). Enkuantu ba kargu Vise Prezidente mantein ho deputada Rosalina Ximenes (PLP).
