Tempo Timor
Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.
Jornalista Jornal Tempo Timor, bandu atu hetan envelope ka sasan ruma husi fontes informasaun sira.
MELLORA JESTAUN KOMUNIKASAUN ESTADU HODI AJUDA PÚBLIKU HATENE
October 14, 2019
‘SAIDA MAK ITA ATU HALO”
Paradigma foun hosi aplikasaun servisu jestaun komunikasaun ohin loron nian hatudu inovasoens kriativas responsivas, adaptável bazeia ba mudansa teknolojia wainhira pais hotu hakat tama era digitalijasaun. Ezizensia hirak ne’e nu’udar resposta konaba transparênsia no responsabilidade hodi hamosu konfiansa públika (Public Trust ) relasiona ho servisu hosi kada ministérius ho ninia ajênsia governamentais sira seluk.
Ho nune’e mudansa konaba padraun komunikasaun iha era digital ne’e transforma ona tipu hosi kanalizasaun informasaun ba publiku liuhosi maneiras oin oin ne’ebe ikus mai mosu jornalismu sidadaun ne’ebe konsideradu nu’udar fenômenu foun iha komunikasaun nian. Xave fundamentu hosi aplikasoens jornalismu sidadaun katak, sidadaun iha ne’ebe deit livremente partisipa ativa hodi relata akontesimentu saida deit maka hetan iha terenu liuhosi kanais propriu ne’ebe mak ezisti tiha ona, wainhira situasaun ne’e presiza ema seluk nia atensaun.
Fenómenu foun ne’e opta pensamentu katak komunikasaun laos ona lao ho modelu diskusaun ema nain rua nian deit maibe sai tiha ona diskusaun ho involvimentu ema barak iha qualquer desizaun ba intereses komum nian. Ho tipu komunikasaun modelu ne’ebe involve ema barak, governu pozisiona kada indivídu sai ona forsa alternativas hodi influensia opiniaun públiku
Portantu, komunikasaun Governu laos deit iha porta-voz ne’ebe briliante, mais presiza mos envolve sidadaun hotu iha prestasaun servisu ho ninia orientasaun ba ninia sidadaun hodi bele hetan feedback antes desizaun ne’e desidi ba intereses públiku nian. Iha países dezenvolvidu ohin loron, requere elaborasaun no promosaun hosi aktus boas prátikas wainhira ita koalia questões transparênsia.
Artigu ne’e atu ajuda oinsa defini estrutura konseitual konaba "partisipasaun" ho analiza hosi mekanismu komunikasaun nian. Ho ninia objetivu hodi responde perguntas: konaba plataformas saida mak bele konsideradu adequadas hodi mellora partisipasaun públiku liuhosi mekanismu komunikasaun governu nian ba ninia sidadaun iha país ne’e. Tanba komunikasaun ne’ebe equilibru no balansu hosi atividades hotu ne’ebe mak halao hosi Governu nu’udar forsa vital no esensial tebes wainhira koalia konaba elementu estratéjiku ba prestasaun servisu.
Wainhira Governu oferese informasaun ho transparente, produtiva ho nia interasaun iha níveis xave konaba oinsa alkansa susesu iha futuru nasaun nian, ajuda ona ninia sidadaun hodi hatene konaba oinsa hatene situasaun atual iha qualquer governasaun ida ne’ebe deit. Ho komunikasaun ne’ebe diak bele sai alternativas iha prosesu hametin estrutura Governu nian wainhira ema hotu konsidera katak komunikasoens Governantes sira iha papel krítiku hodi desempeña prosesu tomak iha konstrusaun nasaun nian.
Banku Mundial iha ninia relatoriu konaba “ Communication for governance and accountability program “ hateten katak kapasidade komunikasaun Governu laos deit konaba diseminasaun informasoens ne’ebe efisiente no efikaz. Maibe presiza mos kapasidade konaba ‘PROMOVE” informasoens nesesáriu maske insufisiente. Dispozisaun no kapasidade hodi hato’o ba sidadaun tenke kombinadu ho kapasidade hakarak atu rona sira nia problema hodi inkorpora nesesidades hirak ne’e iha prosesu balun no promove nafatin informasaun ba sidadaun katak tenke hamosu kunfiansa hosi fontes konfiáveis informasaun hirak ne’e.
Hanoin hosi Banku Mundia nian ne’e realmente atu hateten katak servisu komunikasaun Governu nian laos envolve deit hodi haruka mensajens persuasivas ba públiku, maibe presiza mos esplikasaun polítikas hosi servisu refere (take and give). Konsientiza direitus sidadaun liuhosi dezenvolve mekanismu ne’ebe permita komunikasaun bidiresional (duas parte) entre sidadaun ho Governu sei fo implikasoens pozitivu ba desizoens hirak ne’ebe governantes atu foti ba intereses públiku sei hamosu kumprensaun diak. Komunikasaun bidiresional hateten katak Governu ho públiku sei produz rezultadus governasaun ho qualidade ne’ebe sustentáveis. Ho nune’e prosesu konsultasaun konaba envolvimentu públiku labele atu akontese deit iha tempu eleisoens, krize ou questoens politika sira seluk. Governantes presiza iha kunsiensia no siente katak se sira la aplika maneiras komunikasaun efikazes , forsa opozisaun bele domina ajenda públika. Maneiras ne’e nu’udar solusoens hodi hatudu ba sidadaun katak Governu rona preokupasoens ne’ebe mak hasoru hosi kada sidadaun no ikus mai sidadaun mos hatene kontribuisoens ho tipu saida mak bele oferese hodi solusiona situasaun balun.
SAIDA MAK ITA PRESIZA HALO HODI AJUDA PÚBLIKU SAI SIDADAUN INFROMADU.
Iha prátika, dezevolve politika komunikasaun Governu nian, laos deit sai feramenta hodi jere krize ou ativa iha prosesu hodi halo arkivu ba atividades temporariu sira, maibe envolve mos iha variedade elementus ne’ebe úteis, hanesan konsultasaun konaba elaborasaun polítikas, alkansa konsensu, konsientizasaun, mudansa ba komportamentu, promosaun konaba transparênsia inklui edukasaun sívika hodi hatene sosiedade ninia ideas balun.
Aktus ne’e hodi bele konsidera katak komunikasaun nu’udar atividades instituisoens ou organizasoens nian iha setor públiku ho ninia papel transmiti ou kompartilla informasoens, prinsipalmente ho ninia objetivu aprezenta no esplika desizoens no asoens governamentais, promove lejitimidade hosi intervensoens ne’ebe mak iha, defende valores komum no ajuda públiku hodi mantein lasus sosiais ne’ebe mak iha.
Ho nune’e wainhira ita entende atividade komunikasoens nu’udar inisiativas ne’ebe mai hosi instituisoens públikas ho ninia intensaun afavor ba interesse públiku, ita permite ona komunikasaun bidiresional entre Governu ho sidadaun. Hanesan diálogu, nu’udar pré-requisitu konaba partisipasaun sidadaun iha vida públika. Nune’e mos, komunikasaun hirak ne’e sai mos instrumentu konaba oinsa hodi formula polítikas hodi hamosu konfiansa liuhosi meiu hametin komportamentus sidadaun hotu.
Governamentais sira tenke kumpriende katak komunikasaun laos ona lao ho modelu diskusaun ema nain rua nian deit maibe sai tiha ona diskusaun liuhosi involvimentu ema barak nian iha qualquer desizaun ba intereses komum nian. Ho tipu komunikasaun modelu ne’ebe involve ema barak, governu pozisiona kada indivídus sai ona forsa alternativas hodi influensia opiniaun públiku.
Ida ne’e importante tebes wainhira ita rekunhese valores fundamentais hosi administrasaun governu sentral konaba Estadu de direitu katak requere tebes komunikasaun efikasia liuhosi eleva konhesimentu sidadaun ba desizoens hotu ne’ebe refleta ba iha interese públiku nian. Tanba prinsipiu ida ne’e fundamentu tebes hosi papel komunikasaun governu nian konaba oinsa hato’o idéias no programas ba publiku ho klaru hodi alkansa obtivu ne’ebe planeada. Nu’udar parte prinsipal hosi tarefa governu nian mak tenke kuidadu ho linguasem pirante publiku hodi asegura nafatin bem-estar sosial públiku nian.
Ikus liu, wainhira governu aplika modelu komunikasaun ne’ebe apropriada, bazea ba qualidade dadus hodi suporta informasaun relevantes hirak ne’e liuhosi variedade kanal ne’ebe mak iha, questaun konaba falta de informasaun iha nivel públiku bele rezolvidu wainhira estratéjia hirak ne’e integra iha desizoens ne’ebe atu desidi ba interese públiku nian. Ho modelu ne’e, sosiadade sei iha kunfiansa ba dezenvolvimentu ne’ebe mak atu halao, tanba sosiadade hetan ona informasaun ne’ebe sufisenti nu’udar bukae ba sira hodi sai guarda rede ne’ebe diak ba ninia nasaun.
Renato da Costa
FDCH Fo Tan Bolsu Estudu Ba Estudante 10
October 14, 2019Tempotimor (Dili) – Fundu Dezenvolvimentu Capitál Humanu (FDCH) fó tan bolsu estudu ba estudante na'in 10 iha nivel lisensiatura hodi ba estuda iha Kamboja.
Tuir Ministru Ensinu Superior Siénsia no Kultura (MESSK), Longuinos dos Santos hatete estudante nain 10 ne'e sei kontinua sira nia estudu durante tinan haat nia laran.
"Totál benefisiariu hamutuk na'in 10. Kompostu husi mane na'in 8 no feto na'in 2. Sira sei ba estuda liuliu iha área relasaun internasionál, negósiu internasionál no administrasaun eskolar iha nivel lisensiatura nian durante tinan haat," dehan MESSK iha nia knaar fatin, Segunda (14/10/19).
Longuinos afirma, bolseiru sira ne'e estudu iha Kamboja sei la liu tinan 4. Tanba, iha sira-nia kontratu preve ona kuandu sira la remata tuir durasaun tempu ne'ebé iha, tuir lei sei prolonga tan tinan ida. Bainhira iha tinan ida mós la remata tan, sira tenke fila.
Iha fatin hanesan, representante Sekretáriu Ezekutivu FDCH, Leila Cárceres dos Santos haktuir, FDCH sente orgullu tebes bainhira halo kooperasaun di'ak ho nasaun Kamboja hodi haruka estudante sira ba estuda iha ne'ebá.
"Orgullu tebes bele hetan kooperasaun di'ak. FDCH sempre prontu atu fó apoiu ba bolseiru sira sei hamutuk nafatin ho Ministeriu Ensinu Superior Siénsia no Kultura hodi bele haree no kontrola nafatin bolseiru sira,” Leila hatete.
Entretantu, bolseiru Ricardo Valente Basmeri dos Reis Araujo dehan, nia promete banhira remata nia estudu iha área ne'ebé nia estuda ba, nia sei fila mai hodi dezenvolve nasaun Timor ho di'ak liután.
"Bainhira ami akaba tinan haat, iha mehi ida fila mai iha nasaun Timor hodi dezenvolve no kontribui maximu tebes liuhosi área ne'ebe ami estuda iha nasaun Kamboja," Ricardo promete.
MNEK sai Protetór no Promotór ba Naok-teen Balun
October 13, 2019Tempotimor (DILI)-Deskonfia Kazu naok osan estadu hanesan sai ona kultura iha Ministériu Negosiu Estranjeiru no Kooperasaun (MNEK). Oinsa ema bele para foti osan estadu ba interese privadu, se bainhira hatene ema ne’e halo sala la’os kastigu mak nia hetan maibé protesaun no promosaun ba nia kareira.
Kazu ida ne’ebé bele prova “laran-luak” MNEK nian ba naok-teen sira mak kazu deskonfia naok osan estadu ne’ebé komete husi eis Sekretaria Daruak Embaixada Timor Leste iha Korea Sul ho inisial EdS.
Iha inisiu tinan 2014, MNEK fó fiar ba Sra. EdS hodi ba serbisu iha Embaixada Timor Leste iha Korea Sul hodi sai Sekretaria Daruak ba Embaixadór Hernani Coelho.
Hafoin assume kargu refere, husi tinan 2014 to’o 2015, mosu ona indikasaun mal-jestaun ne’ebé envolve husi Sra. EdS. Hanesan Embaixadór, Hernani Coelho iha koñesimentu ba indikasaun infrasaun ne’ebé mosu iha embaixada.
Iha inisiu 2015, Hernani Coelho hetan konfiansa hodi sai Ministru Negosiu Estranjeiru no Kooperasaun (MNEK) bainhira mosu remodelasaun ba VI Governu Konstitusional. Ministru la nomeia embaixadór foun hodi troka fatin ne’ebé nia husik hela, nune’e Sra. EdS mak sai enkaregada iha tinan 2015-2016.
Hafoin hetan oportunidade ne’e, EdS mós hahú halo asaun. Infrasaun lubuk mosu, no ikus mai EdS komete kazu halakon osan estadu hamutuk rihun $65. Osan ne’e atu selu edifisiu embaixada TL iha Korea Sul.
Atu bele taka nia hahalok ne’e, iha 23 Marsu 2016, EdS halo resibu falsu ne’ebé hatete katak embaixada TL selu ona osan aluga edifisiu embaixada nian.
Maibé, iha inisiu 2017, Ace Rent Real Estate Agency nu’udar na’in ba edifisiu ne’ebé aluga ba sisi sira-nia osan aluga iha embaixada TL iha Seoul, Korea Sul. Sira deklara katak embaixada seidauk selu osan aluga hamutuk KWD 50,000,000 ka USD $49,504,95.
Notisia relevante: Deskonfia MNEK Hak’iak Na’ok-teen
Iha 16 Dezembru 2016, Sekretariu Jeral Interinu MNEK, atual Embaixadór TL ba Washington DC, Isilio Coelho haruka karta garantia ida ba Embaixadora TL ba Korea Sul, Adalgisa M.S. Ximenes
atu selu lai kustu arendamentu ba Embaixada Timor Leste iha Seoul ho nia osan privadu.
“Ministériu Negosiu Estranjeiru no Kooperasaun, atu proteze imajen no salva guarda ba dignidade Timor Leste nian asumi kompromisiu atu responsabiliza Sekretaria EdS iha Embaixada TL nian iha Seoul ne’ebé administra sala pagamentu arrendamentu Embaixada TL nian iha Seoul, agora, halo uma-nain atu hasai embaixada TL no lori Embaixada TL nian ba tribunal, hodi selu fila fali osan ho montante USD20.000.00 ne’ebé Embaixadora Adalgiza Ximenes adianta hodi selu arrendamentu em dividas Embaixada nian ne’ebé refere iha leten,” dehan Isilio iha karta ne’e.
Iha karta ne’e, Isilio Coelho fó garantia ba Embaixadora Adalgisa katak MNEK sei responsabiliza hodi reimbolsa Embaixadora nia osan bainhira EdS la konsege selu.
“Kazu Sekretaria EdS falla halo reembolsu ida ne’e, MNEK hanesan ultima instansia sei assume responsabilidade ne’ebé refere hodi selu fila fali Embaixadora Adalgiza Ximenes nia osan ne’ebé adianta ona ba pagamentu ne’ebá,” nia garante.
Hafoin haruka karta “protesaun no salva guarda imajen” ne’e, iha 8 Maiu 2017, Isilio manda karta ida ba Komisaun Funsaun Publiku (KFP) ho númeru Ref. 55/GSG/V/2017 ho asuntu Instaurasaun Prosesu Dixiplinar ba Sra. EdS, Funsionaria MNEK, ne’ebé aneksa ho dokumentu sira ne’ebe konsidera Sra. EDS komete infrasaun grave tebes iha relasaun ho lejizlasaun sira ne’ebé aplika ba funsionariu publiku sira.
Iha karta ne’ebé CC mós ba Ministru Negosiu Estranjeiru Hernani Coelho no Vise Ministru Roberto Soares ne’e, Isilio informa ba Prezidente Komisaun Funsaun Publiku Faustino Cardoso katak EdS halakon osan estadu ho montante kuaze rihun $65.000.
Iha fulan Agostu 2017, tanba EdS la konsege selu fila fali osan ne’ebé nia halakon, MNEK mak toma responsabilidade hodi reembolsa Embaixadora Adalgiza nia osan hamutuk $20.000 ne’ebé selu ba kustu arrendamentu edifisiu embaixada TL iha Seoul.
Husi dadus hirak iha leten hatudu katak, komponente tomak iha MNEK, inklui Ministru no Vise Ministru hatene kona-ba infrasaun grave ne’ebé EdS komete.
Maibé, ikus mai, iha fulan Juñu 2019, EdS hetan promosaun ba nia kareira hodi sai nu’udar Diretora Administrasaun iha MNEK.
Deskonfia Iha Grupu Protetór iha MNEK
Ba kestaun ne’e, Estudante Universitariu ida, Abilio da Costa konsidera, faktu ne’ebé iha hatudu katak MNEK durante ne’e proteze sira-nia funsionariu ne’ebé komete sala.
“Ho kazu Sra. EdS nian ne’e hatudu katak iha MNEK nia laran iha grupu ida ne’ebé solidu hodi fó protesaun ba malu,” deklara estudante husi departamentu Relasaun Internasional ne’e ba Tempotimor.com.
Aat liu tan, estudante ne’e dehan, MNEK ne’ebé hatene momoos kazu ne’e sei promove EdS sai nu’udar Diretora Administrasaun.
Tuir nia, kazu ida ne’e tau mós iha kestaun integridade diresaun nivel as iha MNEK ne’ebe laiha seriedade atu kombate korrupsaun, aat liu tan iha indikasaun sira koopera ho korruptor sira.
“Kazu Señora EDS nian ne’e tau iha kestaun integridade figura xave hanesan Señor Isilio Coelho ne’ebé foin lalais simu posse husi Prezidente Republika Francisco Guterres Lu Olo hodi sai Embaixadór Timor Leste ba Washington DC.”
Abilio hatutan, la’os de’it atual Embaixadór Isilio nia integridade mak sai kestaun, maibé desizaun PR Lu Olo hodi fó posse ba Embaixadór Isilio Coelho ne’ebé ho konsiente husik kazu korrupsaun buras iha MNEK, hamosu mos pergunta ba Prezidente Republika nia integridade atu halakon korrupsaun no promove boa-governasaun iha TL.
Aleinde ne’e, nia hatete, KFP ne’ebé simu ona keixa iha tinan rua liu ba, 2017, to’o ohin loron seidauk halo asaun hodi prosesa kazu refere, no EdS mós hetan promosaun hodi kaer kargu importante iha MNEK.
“Pergunta boot ba públiku mak ne’e, sera que kazu señora EdS ne’e uniku kazu iha MNEK ka sei iha tan kazu seluk ne’ebé MNEK buka dalan hodi taka tiha de’it ba públiku no husik osan estadu lakon le’et de’it?,” Abilio husu.
MNEK sei Haree Sala ka Lae
Entretantu, Sekretariu Jeral MNEK Jorge Camoes hatete, kazu ne’ebé mosu la signifika katak MNEK tolerante, maibé tanba MNEK nafatin tau prejusaun inosensia iha oin.
“Tolerate, lae, mas prontu prejusaun inosensia ne'e ita tau nafatin iha oin,” dehan Jorge ba Tempotimor.com.
Nia hatete, bainhira MNEK simu keisa ruma, sei haree fila fali internalmente hafoin lori ba parte kompetente, no sei presiza mós tempu atu haree fila fali molok foti desizaun final.
“Prosesu ne'e la'o hela, dala-ruma presiza tempu duni tanba ne'e ita labele dehan ohin mai rezolve kedas, depois presiza haree hotu dadus ne’e didi’ak, ida ne'ebé mak hatene buat sira ne'e entaun dala-ruma tenke crosscheck ba fatin akontesimentu sira balun,” dehan nia.
Importante liu, tuir Sekjer MNEK ne’e, nia parte foti nafatin medida no investigasaun kontinua la’o.
“ita labele hanoin dehan kleur ne'e ita la prosesa, mais sasan la'o hela, ida ne'e mak importante,” dehan nia.
Tuir Jorge, presiza atu haree loloos ema ne’e ninia sala no haruka ba parte kompetente atu bele foti medida.
“Ida ne’ebé MNEK halo mak avalia, sala ka lae, todan ka lae, depois ita enkamiña ba KFP haree fila fali nia prosesu la'o oinsa depois hein desizaun tuir mai, ita enkamiña tutan fali ba parte relevante bazeia ba rekomendasaun ne'ebé mak hetan,” nia hatete.
Tan ne’e, Sekjer ne’e dehan, la signifika katak kazu ne’e la prosesa ka husik de’it maibé serbisu ne’ebé relasiona ho asuntu ne’e kontinua la’o to’o rohan.
Deskonfia Diplomata Naok Osan, Tusan Bobar Konsuladu TL
October 12, 2019Tempotimor (DILI)-Hahalok husi Funsionariu Ministériu Negosiu Estrajeiru no Kooperasaun ida ho inisial SMS ne'ebé durante ne'e serbisu iha Konsuladu Timor Leste iha Sidney, Australia, halo nasaun lakon dupla.
Governu Sei Hadi'a SERVE
October 11, 2019Tempotimor (Dili) – Ministru Koordenadór Asuntus Ekonómiku (MKAE) interino, Fidelis Manuel Leite Magalhães kompromete sei hadi'a kondisoes Servisu de Registu i Emprezariál (SERVE), iha tempu badak nia laran.
"Servisu de Registu i Verifikasaun Emprezariál (SERVE) tutela iha Ministru Koordenadór Asuntus Ekonómiku (MKAE) nian. Tanba ne'e, presiza hadi'a kondisoes atu bele asegura ba sira nia prestasaun servisu," dehan MKAE interino ne'e iha edifisiu SERVE, Kaikoli, Dili (11/10/19).
Ministru koordenadór ne'e subliña, iha VIII Governu Konstitusionál tau prioridade ba setór ekonomia no instituisaun públiku. Tanba ne'e, inklui mós SERVE hanesan instituisaun públiku i agensia Governu nian.
"Governu mós reflete tiha ona orsamentu ba tinan oin atu hadi'a nesesidade saida mak SERVE infrenta, i mós Governu kompremitidu sei hadi'a kondisoes báziku ne'ebé ate agora SERVE iha," dehan Fidelis.
Ministru ne'e afirma, Governu iha ona planu liuliu iha diskusaun ba orsamentu tinan oin, no iha ona ideia ko'alia ho diretór ezekutivu SERVE nian, para oinsá bele hadi'a ona kondisaun sira iha tempu badak nia laran, hodi bele iha espasu ne'ebé dignu, atu nune'e bele fó atendementu di'ak liután ba sidadaun sira.
"Ita mós haree mekanismu atu rai dokumentus sira. Tanba, ida ne'e importante tebes. Nune'e Governu mós iha ona dalan atu koalia ho parseiru dezenvolvimentu sira, atu haree oinsá dizitalizasaun meloramentu sistema informatika sira, para bele salva dokumentus sira ho di'ak bainhira hetan risku ruma," Fidelis tenik.
MT Preve Orsamentu Millaun $1.2
October 11, 2019Tempotimor (Dili) – Diretór Jerál Turizmu, José Quintas hatete Ministériu Turizmu (MT) preve orsamentu hamutuk millaun $1.2, iha tinan 2020 hodi dezenvolve fatin turistiku iha rai laran.
Orsamentu hirak ne'e, sei foka ba iha situ sira hotu-hotu hanesan dezenvolvimentu rekursu umanu, promosaun, turizmu báziku komunitaria no meloramentu ba servisu.
"Tuir planu estratéjiku 2011-2030, ita atu halo dezenvolvimentu ba fatin turistiku iha zona tolu. Tanba ne'e, mak iha tinan 2020 mak sei halo master plan ba zona tolu ne'ebé hanesan parte Leste, Oeste no Sentral," Jose Quintas esplika iha Otél Novu Turizmu, Sesta (11/10/19).
Diretór ne'e afirma, loloos orsamentu husi MT preve millaun $1.5. Maibé, Komite Revizaun Orsamentu hamenus ba 50 %. Maski nune'e, José dehan, orsamentu ne'ebe iha MT komesa haree ona ba master plan iha tinan 2020 nian, para oinsá atu dezenvolve setór Turizmu no haree ona ba longu prazu.
"Halo dezenvolvimentu, presiza mós planu ida ne'ebé di'ak atu konsidera mós ambiente no impaktu sosiál. Labele hakfodak mai dezenu BOQ ba hala'o kedas. Ne'e ladún di'ak. Presiza ho pasensia para bele garante ba kualidade dezenvolvimentu," Quintas esplika.
MEJD: 53.101 Estudante Partisipa EN
October 11, 2019Tempotimor (Dili) – Estudante hamutuk 53.101 husi Ensinu Báziku (EB), Ensinu Sekundáriu (ES) Jerál no Tékniku Vokasionál husi munisípiu 13, sei partisipa iha Ezame Nasionál (EN), ne'ebé sei realiza iha Segunda (14/10/19).
"53.101 estudante ne'ebé kompostu husi Ensinu Baziku ho Ensinu Sekundariu Jerál no Tékniku Vokasionál mak sei tuir Ezame Nasionál iha tinan ida ne'e," informa Ministra Edukasaun, Juventude no Desportu (MEJD), Dulce de Jesus Soares iha seremonia distribui matéria pontus Ezame Nasionál ba 13 munisípiu, iha edifísiu Imprensa Nasionál Timor-Leste (INTL), Kolmera, Sesta (11/10/19).
"INTL entrega ofisiálmente matéria pontus Ezame Nasionál mai Ministériu Edukasaun hodi bele halo distribuisaun ba munisípiu hotu, nune'e bele desloka fali ba Postu Administrativu hodi prepara ba Ezame Nasionál, ne'ebé komesa iha loron Segunda feira oin mai," nia esplika.
MEJD hato'o lia menon ba inan-aman, profesores no komunidade sira hotu, hodi bele fó apoiu espasu no hakmatek ho nune'e estudante sira bele halo preparasaun di'ak liután ba Ezame Nasional tinan ida ne'e.
Eletrisidade Di'ak, Bee Moos Sai Preokupasaun
October 11, 2019Tempotimor (Dili) – Prezidente Komisaun E Parlamentu Nasionál (PN), Deputadu Abel Pires konsidera, liña eletrisidade iha área rurál kuaze di'ak ona. Maibé, bee moos sei sai preokupasaun.
"Iha bee moos nian mak sei preokupa tebes. Iha kapitál Dili de'it sei falta bee moos. Tan ne'e presiza halo eskala seriu liu iha parte bee moos nian, depois mak ba estrada no liña eletrisidade," informa Abel iha Parlamentu Nasionál, Kinta (10/10/19).
Nia rekoñese, infraestrutura báziku kada tinan preokupa hela dei't atu hadi'a. Tantu iha munisípiu no suku balun ne'ebé seidauk di'ak. Maibé, espera ba tan tinan ida rua, garante ona sei asesu hotu," nia promote.
Tuir Abel, durante ne'e, Austrália mós fó sira-nia suporta boot ba infraestrutura estrada rurál, liuhosi programa estrada ba dezenvolvimentu. Tan ne'e, nia dehan, sei garante la'o neineik sei di'ak hotu.
Jullu-Setembru MRT Rekolla US$1.150
October 11, 2019Tempotimor (Dili) – Diretór Nasionál Jestaun no Administrasaun Muzeum Rezisténsia Timorense (DNJA-MRT), Abrão Marino dos Santos katak, husi fulan Jullu to'o Setembru 2019, MRT konsege rekolla taxa hamutuk $1.150 dolares Amérika.
"Fulan tolu nia laran ne'e, ami rekolla de'it $1.150. Osan hira ne'e, ami rekolla husi billete entrada husi estudante Timoroan no vizitante estranjéiru. Kada estudante selu $0.25, vizitante estranjéiru kada ema ida $1.00, ba ferik no katuas sira $0.50 no ba labarik gratuita," tenik Abrão iha nia Knaar fatin, Kinta (10/10/19).
Diretór ne'e afirma, vizitantes ne'ebé hala'o vizita ba Muzeum Rezisténsia Timorense barak liu mak husi estranjéiru.
"Iha tinan 2019, Muzeum Rezisténsia Timorense resista vizitante durante tinan ida ne'e barak liu mak husi estranjéiru, ema hamutuk 1.136 no Timoroan hamutuk 822. Nune'e, vizitante tuir jéneru, feto mak barak liu kompara mane. Tanba, vizitante feto hamutuk 2.552 no vizitante mane hamutuk 102," dehan diretór ne'e.
Entretantu, sasán sira ne'ebé mak rai iha MRT mak sasán sira ne'ebé uluk eroi sira utiliza hodi defende Timor-Leste. Inklui livru hira ne'ebé mak ko'alia kona-ba istória nasaun Timor-Leste nian.
Tama ASEAN, Joven Tenke Estuda Maka'as
October 11, 2019Tempotimor (Dili) – Deputadu Partidu Libertasaun Populár (PLP), Cornelio Gamma (L-7) husu ba joven Timoroan atu aprende no domina lingua barak.
Tanba, tuir L-7 bainhira Timor-Leste ofisiálmente tama ASEAN, joventude Timoroan bele kompete ho joventude husi nasaun ASEAN seluk. “Joventude sira mak futuru nasaun nian. Tanba ne'e, presiza estuda maka'as no aprende lingua barak, atu bele koloka no kompete iha ASEAN,” hatete membru Komisaun B, Parlamentu Nasionál (PN) ne'e, Kinta (10/10/19).
Relasiona ho setór seguransa rai laran, bainhira TL tama ASEAN, tui eis komandante gerrilleiru FALINTIL ne'e afirma, parte seguransa asegura tebes. Tanba, tuir L-7, ohin loron laiha ona inimigu entre nasaun ba nasaun seluk. Inklui mós iha nasaun ASEAN.
in English
Popular
Error: No articles to display
.