Iha karta ne’e EDTL husu kompañia SACOM Enerjia, Lda ninia boa fé atu hatama balansu kombustível ba EDTL Betanu ho prazu to’o loron 20 fulan Dezembru, no bainhira la konsege hatama maka sei aplika failansu tuir kontratu determinadu.

Kona-ba asuntu ne’e parte kompañia SACOM Enerjia, Lda liuhosi ninia prezidente administrasaun Abílio Araújo deklara pozisaun katak, Governu maka viola kontratu no sai Maupagadór.

“Kona-ba karta, ha’u rasik hakerek ba Ministru dehan katak, ha’u la husu ona Estensaun, maibé husu ba Governu bazeia ba informasaun husi Karta fulan Outubru nian ne’ebé EDTL rasik mak dehan katak, mina sei nakonu iha Betano to'o fulan Fevereiru. Entaun, SACOM Enerjia propoin atu hatama iha Janeiru ro bo'ot ida lori mina mai Hera tanba SACOM kualifikadu hodi manan tender ba tinan oin no sei lori hamutuk restu ne'ebé sei falta ba Betano,” Abilio da Conceição Abrantes de Araújo hateten ba www.tempotimor.com foin lalais ne’e via Whatsapp.

Nia esplika katak, ida ne’e nu’udár proposta ho boa fe nian no Kuandu ko’alia dehan katak, kompañia SACOM la kumpre kontratu ne'e tenke kuidadu, tanba MOP to'o agora mós la kumpre kontrato, liuliu seidauk selu hotu no pagamentu sira ne’ebé halo ona mós MOP la kumpre kontratu prazu pagamentu, nune’e SACOM hetan prejuizu barak los.

“To'o agora Ministru seidauk responde ba ha’u nia karta ikus ho data 17 Dezembru, maibé diretór ida mak ko’alia fali ne'e,” Abilio dehan.
Nia Haktuir, mina nakonu hela iha Betano, SACOM hatama ona 96% tuir kontratu no tuir regras internasionál kona-ba komérsio internasionál ba Setór mina nian, sempre aplika deskontu + - 5% ba kuantidade kontratu nian.

Nune’e, nia hatutan, SACOM kumpre ona kontratu, maibé ho boa vontade mak SACOM rasik halo proposta ida ba Ministru.

“Nia la responde, maibé diretór produsaun mak responde, enkuntu Kontratu ne'e Ministru ho ha’u mk assina. Ha’u nia resposta dehan iha ha’u nia karta, MOP la kumpre kontratu desde 2017 to ohin, etc,” Abílio Araújo kondena.

Entretantu to’o ohin SACOM Enerjia Lda ho nia parseiru Trafigura Pte, Ltd seida’uk hatama mina ba EDTL Betanu ho balansu totál 2, 053,629.67 litru.

Maske www.tempotimor.com halo ona esforsu ho hetan resposta husi parte MOP no EDTL maibé to’o notisia ne’e publika, parte Governu nian la fó resposta ruma kona-ba alegasaun husi kompañia SACOM Enerjia Lda. (*)