Tuir aprezentasaun Ministra Saúde, Odete Maria Freitas Belo halo ba Konsellu Ministru, kuarta (13/10) kona-ba rezultadu kampaña vasinasaun ne’ebé konta ho partisipasaun membru Governu sira hotu, ne'ebé hahú iha loron 30 fulan-setembru.
Durante períodu ne’e, membru Governu sira ba munisípiu hotu hodi fahe informasaun kona-ba vasina kontra Covid-19 no sensibiliza populasaun ba nesesidade vasinasaun nian.
“Dezde hahú kampaña ho partisipasaun membru Governu sira nian, administra ona totál vasina 78.165, ne'ebé hanesan aumentu ida 17% husi persentajen vasinasaun iha nível nasionál”, dehan Ministru Prezidénsia Konsellu Ministru, Fidelis Leite Magalhães, iha palásiu Governu, kuarta (13/10).
Tanba iha semana ida husi loron 30 fulan-setembru to’o loron 10 fulan-outubru, Bobonaru nu’udar munisípiu ho kreximentu boot liu, ho aumentu 303%, ho totál hamutuk ema na’in-7.487 ne’ebé simu ona vasina iha periodu ida-ne’e, liután 5.629 duké iha semana anteriór.
Tuir fali munisípiu Baukau ho kreximentu 122%, ne’ebé vasina tan ema hamutuk 5.286 duké iha semana anteriór. Munisípiu Ermera iha ona 97% kompara ho semana anteriór husi inísiu Kampaña vasinasaun ho membru Governu sira, ne’ebé vasina tan ema hamutuk 3.885 duké iha períodu anteriór.
Iha ne’e mós prevé katak vasina dahuluk Pfizer nian, ne’ebé destina hodi permite vasinasaun ba joven sira idade tinan 12 to’o 17, to’o iha Timor-Leste, loron 16 fulan-outubru, husi Mekanizmu COVAX. (*)
