Segundu komandante PNTL munisipiu Dili, Superintendente Polísia, Euclides da Costa Belo dehan, vasinasaun ne'e hahú ona, tanba relasaun ho oráriu ne'ebé sira simu komandu jerál, nune'e médiku sira hahú halo vasina.
"Ha'u ho tan sira seluk iha munisipiu Dili ne’e vasina ona", informa Komandante Euclides hafoin simu vasina husi médiku PNTL nian iha Kaikoli, kuarta (15/04).
Oráriu ba vasina ne'e kontinua nafatin, maibé iha faze dahuluk ba komandante tránzitu nasionál no komandante polisiamentu komunitáriu.
Bainhira simu vasina nee sente konfortavel. “Ha'u di'ak hela, sente konfortavel, sente oin la halai, purtantu sintomas ne'ebé médiku sira fó hatene ho reseita ne’ebé di'ak", dehan nia.
Komandu jerál fo hatene ona ba membru hothotu obrigatoriamente tenke tuir vasina, tanba ne'e iha efeitu pozitivu.
Aleinde Xefe Departamentu Polisia Komunitáriu Nasionál (PKN), Superintendente Polísia, António da Luz hatete, vasina iha faze dahuluk ne'e, fó prioridade uluk ba komandu Munisípiu Dili.
"Ami foin mak hetan vasina, ha'u sente di'ak hela", dehan nia.
Totál membru husi polisiamentu komunitáriu nian hamutuk na'in-15 mak simu uluk husi médiku sira no tuir planu sei kontinua tan ba membru sira seluk. (*)
