Prokuradór Jerál Repúblika (PJR) José da Costa Ximenes, hateten prosesu sira ne'ebé durante fulan sanulu iha 2020 nian, MP konsege rejista prosesu liu 5.000.

"Halo balansu jerál ida ba atividade prosesuál MP nian hahú 1 Janeiru to'o 31 Outubru, ne'ebé prosesu tama ona iha MP kuaze rihun lima resin. Maibé, iha fulan Outubru de'it iha nasionál MP rejista prosesu 612," PJR hateten ba jornalista sira iha Palásiu Prezidensiál Bairru-pité, Segunda (16/11).

José mós afirma, prosesu ne'ebé rejista agora konsidera liu ona kapasidade MP nian.

"Ha'u bele dehan, ultrapasa kapasidade ita-nian hodi responde, entaun ita konsege fó resposta de'it 577, ne'ebé ita termina ona, ne'ebé kompostu husi akuzasaun 320 resin no arkivamentu 257 resin, ne'e ba fula Outubru de'it. Entaun, husi Janeiru to'o Outubru ita konsege remata prosesu 6.000," nia dehan.

Nia hatutan, estabilidade iha nasional la'o normál fali, nune'e kazu besik 3.000 mak sei pendente.

"Kazu ne'ebé pendente ne'e signifika la movimenta, maibé ita-nia ne'e kazu movimenta maibé la signifika ita halo dala ida. Entaun, ida ne’ebé ita finaliza no ida ne'ebé tama foun mai ne'e tama nafatin. Kazu sira ne'ebé durante ne'e rejista, barak liu mak ofensas ba integridade, segundu mak violénsia doméstika, omesidu, arma branka, na’ok no krime seluk tan, maibé iha Dili kazu barak liu mak iha postu administrativu Don Aleixo," José informa.

Entretantu, PJR mós relata ba PR Lú Olo kona-ba prosesu promosaun ba juis majistradu sira ne'ebé sei hala'o iha sesta semana ne'e.

"Konsellu Superiór Ministériu Públiku (KSMP) iha sesta (20/11), sei halo reuniaun ne'ebé deskute kona-ba prokuradór majistradu sira ne'ebé prienxe tinan haat hodi halo inspesaun ordináriu ba fim de promosaun," nia dehan.

Alende ne'e, PJR mós relata ba konstrusaun edifísiu ba departamentu Kombate krime organizadu iha Kolmera ne'ebé atinje ona pursentu 46% ba 50% no konstrusaun ba edifísiu PJR nian iha Munisípiu Lautem postu administrativu Lospalos ne'ebé atinje ona pursentu 26% to'o 35%.(*)

PUBLISISDADE