"Apoiu husi governu nian, seidauk, ita hato'o ona karta liuhusi foti dadus ba protesaun sivíl, maibé ita-nia organizasaun Naun Governamental sira, fó ona apoiu ai-han mai ita-nia komunidade sira ne'ebé mak hetan inundasaun ne'e rasik”, informa Xefe Suku Mantelolaun, Sergio Axis Lopes Sarmento liuhusi telefone ho www.tempotimor.com, Domingu (23/05).

Durante inundasaun, komunidade uma-kain hamutuk 69 mak sira uma hetan sobu husi mota, maibé uma-kain 8 mak kondisaun gráve liu (aat totál), no oras ne'e evakua provizóriu hodi hamahan iha Kapela Wekiar.

"Ida gráve liu, totál uma laiha ne'e mak iha Umakain 8 eh sira rasik mós husik sira-nia uma, mai hela kedan iha ita-nia kapela ne'e rasik”, dehan nia.

Entretantu, komunidade sira ne'ebé oras ne'e hela iha Bairru Bekiar, mai husi Suku Mantelolaun ho Wenunuk nia ema, ho aldeia haat mak hanesan, Wenunuk, Mantelolaun, Lebutun, ho Haslaran.

Problema ne'ebé komunidade sira enfrenta liu bee-mós estrada, eletrisidade no inklui ho bronjong, tanba uma besik mota.

Antes ne’e, kompaña lokál Hakimonik, Lda. ba halo ona instalasaun rin eletrisidade, maibé fiu eletrisidade sei paradu durante tinan tolu ona (2018 to'o 2021), tanba la hetan lisensa husi governu sentrál liliu Ministériu Obras Públika (MOP).

"Sira hahú iha 2018, entaun sira paradu tinan tolu ona, tanba kompaña la hetan karta legál ruma husi estadu, tanba ne'e mak seidauk”, hatete nia.

Tuir dadus populasaun iha Suku Mantelolaun Uma-kain hamutuk 269 ho membru família 468. (*)