Tempotimor (Dili) - Atu rekupera ekonomia iha rai-laran liuhusi dalan apoiu ba família sira inklui produtór agríkola, governu liuhusi Konsellu Ministru aprova ona atribuisaun sesta bázika ne'ebé aprezenta husi ministru koordenadór asuntu ekonómiku.

Projetu dekretu lei ne'e hatuur mós mekanizmu no kondisaun sira ba implementasaun medida hirak ne’e inklui kria rejime espesiál ba aprovizionamentu iha ámbitu sesta bázika nian.

Benefisiáriu husi sesta bázika rasik mai husi agregadu familiár ne'ebé eskreve ona iha livru rejistu uma kain, sidadaun timoroan ne'ebé tama iha instituisaun sósiu-edukativa, relijioza, prizioneiru.

"Sesta bázika ne'e sei atribui iha fulan-Novembru no Dezembru, ne'ebé nia montante fiksa ona to’o US$ 25 ba membru ida-idak husi agregadu familiár nian kada fulan iha fulan rua nia-laran, sesta bázika ida bele troka ho folin sasán ne'ebé korrespondente ba valór osan nian," hakerek iha komunikadu imprensa ne'ebé www.tempotimor.com asesu, Kuarta (23/9).

Iha karta komunikadu hateten, medida sesta bázika bele tulun família sira-nia nesesidade bázika hodi kontribui kombate hamlaha no vulnerabilidade ne'ebé eziste iha rejiaun balun ne'ebé kiak no izoladu.

Apoiu sesta bázika ne'e mós no nia objetivu atu estimula dinámika ekonomia lokál liu husi sirkulasaun rekursu finanseiru ne'ebé presiza tebes hasae produsaun nasionál, nune'e hamenus krize husi impaktu Covid-19. (*)

Tempotimor (Dili) - Tuir dadus ne'ebé relata husi Polisia Nasionál Timor-Leste (PNTL) hatudu durante fulan Janeiru to’o Setembru tinan 2020, rezulta númeru ema mate hamutuk na’in 48 tanba kauza husi asidente tráfegu.

“Ita haree ba asidente ne'ebé mosu iha Janeiru to'o Setembru ne'e hamutuk 48, rezulta ema mate no ema kanek. Barak maka menoridade, tanba de'it sira utiliza motór beat ne'e", dehan Portavós Komandu Jerál PNTL, Superintendente Xefe, Arnaldo Araújo, iha Kuartél Jerál Kaikoli, Kuarta (23/09).

Arnaldo hateten, maioria ema ne'ebé mate kompostu husi labarik sira ho menoridade no balu joven mak hetan dezastre tanba monu ho motór.

Ba situasaun ne'e, nia husu ba joven sira no liuliu ba inan-aman sira atu kontrola nia oan sira, bainhira sai karik labele mosu asidente ba sira. (*) 

Tempotimor (Dili) - Ministra Negósiu Estranjeiru no Kooperasaun (MNEK), Adalgisa Xavier Magno deklara, husi fulan-Janeiru to'o Setembru 2020, MNEK konsege ezekuta ona osan hamutuk tokon US$16 husi Dotasaun Orsamentál Temporariu (DOT).

Nia hatutan, hanesan públiku hatene DOT ne'ebé uza iha fulan hirak ne'e ba sustenta de’it rekursu MNEK nian.

Nia afirma, liga ba proposta Orsamentu Jerál Estadu 2020 nian, MNEK hetan tokon US$ 20-resin, tanba ne'e soma hamutuk ho osan tokon US$ 16 ne'ebé antes ne'e gasta ona.

Ne'e duni, kona-ba proposta OJE 2020, daudaun parte MNEK esplika ona ba Komisaun B liuhusi audiénsia publika dahuluk ba OJE 2020 iha PN.

"Ami kuaze %70 ezekuta ona, hela de’it ona restu ne'e tempu badak ami sei ezekuta hotu kedan," dehan nia, hafoin audiénsia publika ba proposta OJE 2020 ho Komisun B, iha Parlamentu Nasionál, Kuarta (23/9).

Nia haktuir, normalmente alokasun OJE 2020 ba MNEK ho totál tokon US$ 28 maibé hetan redusaun tanba iha ámbitu surtu Covid-19, laiha viajen no laiha atividade importante ruma. (*)

Tempotimor (Dili)-Relasiona ho moras pandemia Covid-19 ne'ebé dadaun ne'e sei sai prekupasaun ba mundu inklui Timor-Leste, governu liu husi Ministeiru transporte no kumunikasaun sei evita aviaun komersial tama iha Timor-Leste.

Tempotimor (Manufahi)-Eis Komadante ein Xefe Falintil Kay Rala Xanana Gusmão hatete, saudozu Nicolao Lobato mate iha Binani, Aldeia Maubesi, Suku Mindelu, Postu Administrativu Turiskai, Munisípiu Manufahi, tanba faila iha estratejia politika ba funu.

Tempotimor (Dili) - Iha enkontru semanál entre Xefe Estadu Maiór Jenerál F-FDTL, Majór Jenerál Lere Anan Timur ho Prezidente Repúblika (PR), Francisco Guterres Lú Olo, nu'udar komandante supremu forsa armada nian husu forsa sira servisu hanesan lutu ba nasaun.

Tempotimor (Dili)- Relasiona Surtu Covid-19 ne'ebé kontinua sai ameasa iha mundu inklui Timor-Leste, governu liuhusi Konsellu Ministru propoin ba Prezidente Repúblika, Francisco Guterres Lú Olo, atu estende tan Estadu Emerjénsia ba dala VI.

Tempotimor (Dili) - Prezidente Autoridade Rejiaun Administrativu Espesiál Oekusi-Ambenu, Arsénio Bano hateten, dadaun ne'e Oekusi susar tebes ba bee-moos, nune'e sei preve Orsamentu Jerál Estadu tinan fiskál 2020 hodi halo perfusaun iha fatin lima.

Tempotimor (Díli)-Projetu hamutuk 143 ne’ebé konsege sai polemika iha públiku no hetan mós intervensaun husi Parlamentu Nasional liu husi kriasaun komisaun inkeritu ida ne’ebé maske ikus mai gasta osan saugati de’it tanba la produs relatoriu, imposivel ona atu halo pagamentu.

Tempotimor (Díli) - Daudaun ne'e governu hahú planeia ona hodi tau orsamentu ba kada ministériu sira iha Orsamentu Jerál Estadu (OJE) ba tinan fiskál 2021. Nune'e, totál pakote orsamentu ne'ebé Ministériu Obras Públika (MOP) simu ho montante tokon US$ 176.