Vise Ministru Saúde (VMS), Bonifácio Maukoli hateten, karreta Ambulánsia sira ne'e doasaun husi governu Japaun hamutuk 37, maibé kareta ida sei apoiu ba Protesaun Sívil no ambulánsia 36 sei distribui ba munisípiu 12 no Rejiaun Administrativa Espesiál Oekusi Ambeno (RAEOA).

"Ida ne'e diskusaun entre ministériu saúde ho governu Japaun ne'ebé sira komprometidu ona atu haruka 37 ambulansias, maibé ida sei fahe ba Protesaun Sivil, 36 mak sei halo distribuisaun ba iha munisipiu sira, ba

Ospitais referais, 12 munisipius inklui RAEOA", Vise Ministru Saúde, Bonifácio Maukoli hateten hafoin partisipa iha debate jeneralidade OJE 2021 iha PN, Tersa (01/12).
Kona-ba manutensaun ba karreta ambulánsia sira bainhira nia kondisaun aat, nia dehan, MS rasik iha ona institutu ketak ida naran Servisu Nasionál ba Ambulánsia (SNA), mak sei responsábiliza hodi halo jestaun ba manutensaun no operasionalizasaun.

Nia hatutan, kada tinan governu liuhusi Ministériu Saúde (MS) sempre tau orsamentu hodi halo manutensaun ba ambulánsia ne'ebé aat, maibé nia mós husu ba motorista sira atu utiliza kareta ambulánsia sira ho kuidadu nune'e bele uza ba tempu naruk.

"Ita hatene situasaun jeografika ne'e, fila-fali ba motorista sira, oinsá iha konsiénsia atu asegura kareta ne'e hanesan ita nian, labele naran halai, dala-ruma kareta bele estraga lalais", nia dehan. (*)