Tuir nia, durante pandemia Covid-19 mundu tomak buka maneira no medida sériu hodi buka dalan ba kombate, maibé Timor-Leste laiha seriedade hodi kombate tanba mosu fali ona kazu importasaun foun husi Indonézia.

"Hau lamenta tebes ita-nia seriedade ba kombate Covid-19, ita la hatudu seriedade signifikante, depois agora mai ne'e ita haree hanesan politizadu liu," dehan José, iha nia knaar fatin, Palapasu, Dili, Kuarta (05/08).

Nia akresenta, fundu Covid-19 ne'ebé governu halo levantamentu husi fundu mina-rai nia ezekusaun to’o iha ne'ebé loos.

"Ita haree nia ezekusaun la klaru, ita kestiona buat barak loos. Ezemplu dehan sosa ekipamentu Covid-19, se ita sériu mak ekipamentu ba Covid-19 presiza tebes, iha Parlamentu levanta katak ita-nia ventiladór ne'e ida de’it, signifika moras ne'e to’o ita laiha kapasidade," dehan Oliveira.

Alende ventiladór, nia lamenta ho ekipamentu teste Covid-19 ne'ebé até agora seidauk halo teste masal iha Timor-Leste.

"Maneira ida ne'ebé nasaun hotu iha mundu ne'e atu kombate Covid-19 mak halo teste masal, too agora ekipamentu sira ne'e laiha," dehan nia.

Prezidente Repúblika, Francisco Guterres Lú Olo, hamutuk ho membru Konsellu Superiór Defeza no Seguransa, inklui Konsellu Estadu, hala'o hela reuniaun hodi rona opiniaun relasiona ho pedidu governu hodi implementa fali Estadu Emerjénsia hafoin Timor-Leste mosu fali kazu foun Covid-19. (*)