Vise Prezidente Parlamentu Nasionál Luis Roberto hatete, KHUNTO seidauk realiza konferensia extra-ordinaria tanba governu daualu sei mantein.

"To'o agora ami, partidu KHUNTO, seidauk hamosu konferénsia extraordináriu ida, tanba ami fiar katak governu daualu mantein nafatin," dehan Luis iha PN, Segunda (11/05).

VIDEO PUBLISIDADE APELU HUSI PM TAUR APLAUS BA FRONT LINE

Nia dehan, governu ne’ebé lidera husi PM Taur sei la’o nafatin no hetan konfiansa husi Prezidente Repúblika Francisco Guterres Lu Olo.

"Ita-nia Prezidente Repúblika mós nafatin fó fiar ba oitavo governu ne'ebé lidera husi Primeiru Ministru Taur Matan Ruak, tanba ne'e ami KHUNTO mós hola parte iha laran, ne'ebé ami seidauk halo konferénsia extraordináriu par responde ba ezijensia ne'ebé mai husi partidu sira seluk," dehan Roberto

PUBLISIDADE

Tuir Luis, maske sai ona husi koligasaun Aliansa Maioria Parlamentar (AMP) foun, maibé sira sei kontinua iha komunikasaun di’ak ho partidus politiku hotu-hotu.

"Komunikasaun partidu KHUNTO nian ba partidu hotu-hotu ne'e sempre la'o di'ak, tanba komunikasaun importante ba partidu KHUNTO, tanba ne'e KHUNTO sei la hatuun partidu A ka B, maibé KHUNTO sempre di'ak hela de'it, entaun saida mak akontese fali ba futuru, KHUNTO sempre iha klaran par fó apoiu nafatin," dehan nia.

Entretantu, molok ne’e, Prezidente CNRT Kay Rala Xanana Gusmão husu ba partidu KHUNTO atu realiza konferensia ida hodi deside sira-nia pozisaun sai husi AMP foun.

PUBLISIDADE