Tempotimor (Dili) - Autoridade lokál Suku Maudemu, Maria Fátima, sente kontente no agradese ba Sekretáriu Estadu Kooperativa, Elizário Ferreira, tanba planu atu loke merkadu fronteira.

"Agrdese tebes tanba atu loke bazar iha fronteira nian, entaun ami agradese tanba bele ajuda ekonomia mai ami-nia suku, liuliu família agrikultór," dehan Xefe Suku Maudemu, iha ninia fatin, Kinta (17/9).

Xefe Suku akresenta, bainhira merkadu fronteira mak loke bele ona ajuda komunidade agrikultór sira atu fa'an produtu hanesan nu, batar fini, fore metan, fore mungu, pateka.

Enkuantu, durante ne'e komunidade iha suku laiha merkadu atu fa'an produtu agrikola ne'ebé sira produs, tanba ne'e mak bainhira loke merkadu fronteira bele motiva ona agrikultura sira atu hasa'e produsaun.

"Loloos nia kuantidade sempre kontinua, maibé tanba ita laiha dalan ba merkadu entaun ami produs hotu tiha mak produs fali," dehan Maria.

Nia akresenta, ho prezensa SEKoop nian hanesan loke ona hanoin no dalan, nune'e ba oin agrikultór sira aumenta produtu agrikultura.

Iha fatin hanesan, Sekretáriu Estadu Kooperativa, Elizário Ferreira hateten, iha tempu besik sei koordena ho Ministériu Komérsiu Indústria no Ministériu Estatál koordena diak liutan hodi implenta fali merkadu fronteira entre Timor-Leste ho Indonézia.

Nune'e, SEKoop husu atu grupu agrikultór sira hahú nakfilak aan ba kooperativa, nune'e hasa'e liután produsaun ai-han hodi perpara ba planu inplementasaun merkadu fronteira. (*)  

Tempotimor (Atsabe)-Eis Prezidente Repúblika (PR) Dr. Jose Ramos Horta nu'udar mós oan ida ne'ebé moris iha rai Atsabe hamutuk ho eeis komandante  xefe das FALINTIL Kayrala Xanana Gusmão inagura uma lisan haat husi familia boot Haurema.

Uma lisan ne'ebé lider nasionál rua ne'e inagura mak hanesan, Uma lisan Uma Bermeta, Uma Lekibela, Uma Aculebelior no Uma Salala.

"Ha'u kontente mai iha ne'e, tanba ida nee mak ita-nia identidade," dehan Xanana iha nia intervesaun ba inagurasaun familia boot Haurema, Sabadu (19/9).

Lider karizmátiku ne'e afirma, fiar Maromak ne'e bele, maibé lisan importante liu.

"Maromak ha'u mós fiar maka'as, maibé ita-nia lisan, ita-nia kultura, ligasaun ho natureza, imi fiar ka lae, maibé ha'u liuhusi ne'ebá, ne'ebé halo took ba, uma lisan haat ne'e, kaer metin unidade, labele estraga, kuda dame no domin, hodi harii no kontrusaun estadu," nia afirma.

Xanana mós afirma, buat ne'ebé katuas sira lori mak ha'u-nia abut, ha'u-nia ran.

Entretantu, eis PR Ramos Horta mós kongratula ba familia boot Haurema, tanba ne'ebé iha ona uma mahon.

"Ha'u atu dehan de'it katak, parabens ba imi," dehan Horta.

Iha inagurasaun ne'e, Jacinto Rigoberto nu'udar maun boot husi uma lisan haat katak, harii uma lisan ne'e la'ós maun-alin husi familia Haurema de'it, maibé husi parte hotu-hotu.

"La'ós maun alin husi uma haat ne'e nian, maibé husi parte umane, mane foun husi fatin oioin," dehan Rigoberto.

Nia mós afirma, halo lisan halo ho ninia lisan rasik, ne'e duni, avó kuku gase ne'e importante tebes, tanba kuandu ita la kumpri, nia konsekuénsia diretamente kedas ba ita.

Lia-na'in ne'e mós agradese ba Kayrala Xanana Gusmão no Ramos Horta tanba ofesilamente inagura ona uma lisan haat husi familia boot Haurema nian.

Entretantu uma lisan husi familia boot Haurema ne'e lokaliza iha suku Malabe postu Atsabe munisípiu Ermera ne'ebé kompostu husi maun-alin na'in 10 no jerasaun sira ne'ebé la konsege sura.

Iha inagurasaun ne'e, ofesilamente tesi fita husi Ramos Horta no Xanana Gusmão mak asina plaka uma lisan nian, husi maun-alin, oan no bei-oan sira husi uma lisan haat ne'e inklui deputadu José Virgilio, deputada Maria Gorumali Bareto, deputada Bendita magno, eis SEKoop Arsenio Pereira, liurai 12 husi postu administrativu Atsabe, Prezidente Autoriedade Munisípiu Ermera, Virgílio Smith.(*)

Tempotimor (Atsabe)-Komandante ein xefe Falintil Kayrala Xanana Gusmão no eis Prezidente Repúblika (PR) José Ramos Horta halo abertura ba kopa Sali-Magu hodi promove talentu juventude postu administrativu Atsabe munisípiu Ermera nian.

Iha abertura ne'e, Xanana Gusmão dehan, juventude la'ós estuda de'it, maibé promove mós telentu iha área desportu no múziku.

"Ita la'ós estuda de'it, maibé ita mós dezenvolve ita-nia saúde liuhusi desportu no muziku," katak Xanana hafoin halo abertura ba jogu futebool kopa Sali-Magu, Sábadu (19/9).

Hafoin haree kondisaun kampu ne'ebé juventude postu Atsabe uza , Xanana no Horta promete sei fó apoiu.

"Ha'u hatene imi-nia difikuldade, tanba rai mak ladi'ak, maibé ha'u tenke louva imi. Avó Horta mak sei fó apoiu ba rede futeboll nian, ha'u (Xanana) mak sei fó apoiu ba rede voleiboll no baskuetboll," dehan Xanana.

Husi jogu amijade ne'e, Xanana husu juventude Atsabe oan atu kria amijade iha área desportu no seluk tan.

Iha fatin hanesan diretór ensinu báziku sentrál José Ramos Horta, Angelino Monteiro agrdese ba ba lider na'in rua ne'e, tanba halo ona Abertura ba kopa refere.

"Ami agradese ba maun boot na'in rua, tanba bele hit aan mai iha ne'e hodi halo abertura ba kopa ida ne'e," nia tenik.

Entretantu estudante ne'ebé hala'o estudu iha EBC José Ramos Horta hamutuk 650 kompostu husi mane no feto nomós manorin sira hamutuk 18, sala aula 12 kompostu husi aula no sala profesór sira-nian.

Tempotimor (Dili) - Governu liuhusi Ministériu Turismu no Komérsiu  Indústria (MTKI) iha tinan ne'e, sei tau prioridade ba promove setór turizmu doméstiku iha Timor-Leste.

Lia hirak ne'e hato'o husi hafoin hala'o komunikadu imprensa iha edifisiu sentru Formasaun Turismu Bidaun lesidere Sesta (18/9).


Diretor Jeral, MTCI Jose Filipe hateten, liga ba oomemorasaun loron mundial turizmu iha  27 Setembru 2020 nian ho ambitu situasaun Covid-19, ida ne'e hanesan situasun ka dezafiu ne'ebe boot tebes, maibe ho dezafiu ne'e nu'udar oportunidade ba governu atu promove setór turizmu doméstiku iha rai-laran.

"Ho situasun ida agora Liga ba seitor turismu nian, Ministeriu Turismu mos Iha politika ida sei foka liu ba turismu domestiku, iha surtu prazu," dehan nia, iha Sentru Informasaun Turizmu, Lesidere, Sesta (18/9).

Kona-ba promove setór turismu ne'e Nia Esplika ida ne'e Ministeriu Turismu sei servisu hamutuk ho parseiru dezenvolvimentu sira, para kontinua aproveita loron mundial turismu ida ne'e hodi promove timor-leste nia Seitor turismu, no planu ne'e sei realiza hahu loron 22 setembru 2020. (*)  

Tempotimor (Dili)-Hafoin eis Prezidente Repúblika Dr. Jose Ramos Horta hahi eis komandante en xefe das FALINTIL, Kay Rala Xanana Gusmão nu'udar mesias no besi-asu Timor-Leste, iha okaziaun hanesan Xanana GGusmao fila rekoñese eis Prezidente Repúblika, Dr Jose Ramos Horta nu'udar komandante en xefe ba Luta Libertasaun Nasional iha diáspora.

Tuir Xanana, Horta nu'udar komandante en xefe, “tan ba nia mak ha'u-nia liman loos.”

"Iha 86 ha'u sai husi Fretilin, tanba bolu ha'u traidór, entaun nia (Horta) mak hekerek surat ba ha'u no nomeia nia hanesan reprezentante espesiál komandante Falintil nian, hodi nia bele ko'alia, istória sira ne'ebé akontese ona ne'e akontese," dehan Xanana liuhusi nia diskursu bainhira halo asaun karitativa ba komunidade kbiit laek sira iha suku Katrai Lauana, Sesta (18/9).

Nu’udar komandante en Xefe das FALINTIL iha ailaran, momentu ne’eba Xanana Gusmao lakon konfiansa ona  ba nia kompatriota sira iha rai liur ne'ebé, “bolu ha'u (Xanana) traidor.”

"Maun Ramos Horta ne'e mak ita temi karaik, ha'u atu temi karik ha'u-ha'u-nia liman loos iha liur ne'ebá, mais nia mak sai portavoz, nia mak sai reprezentante espesiál komandante ein xefe Falintil hodi ko'alia iha ne'ebá," nia dehan.

Eis Líder Máximo Konsellu Nasional Rezistensia Maubere (CNRM sigla Portuges) ne'e afirma, bainhira laiha reprezentante espesiál iha rai liur, maka TL nia luta sei hasoru dezafiu barak.

"Se laiha ne'e susar, tansa susar? Tanba susar teb-tebes komunika ba malu. Ne'ebé ami rua mosu iha ne'e, nia reprezenta servisu husi liur, ha'u iha ne'e, ita katuas sira hamutuk, kompleta malu mak ida ne'e," katak Xanana.(*)

Tempotimor (Atsabe)-Hafoin viajem husi suku Katrai Lauana postu administrativu Letefoho iha tuku 17:35 to'o iha postu administrativu Atsabe Munisípiu Ermera iha tuku 19:20, kontinua kedan ho asaun karitativa no halo esklaresimentu kona ba prevensaun moras Covid 19.

Iha momentu hanesan eis Prezidente da Republika, Dr. Jose Ramos Horta haklaken ba publiku,  Xanana Gusmão mak restauradór independénsia Timor-Leste.

Horta dehan lia hirak ne'e, hafoin fó intervensaun ba asaun karitativa ne'ebé eis komandante en Xefe das FALINTIL, Kay Rala Xanana Gusmão halo ba povu kbiit laek iha korasaun postu administrativu Atsabe.

"Maun Xanana mak boot, nia mak ita-nia lider. Tanba nia mak ohin loron ita hela iha rai ida naran Repúblika Demokrátika Timor-Leste (RDTL)," dehan Horta liuhusi intervesaun ba atividade asaun karitativa iha postu Atsabe, Sesta (18/9).

Horta haklaken, ohin loron ema hotu moris iha liberdade, tanba Xanana.

"Nia (Xanana) mak restauradór independénsia. Independénsia iha 1975. Depois iha 7 Dezembru invazaun tama iha TL, depois Nicolau Lobato mate, ikus mai maun boot Xanana mak lori todan," katak Horta

Horta mós dehan, Xanana mak hulan todan hotu husi Luta nian, tanba reorganiza Fretilin, Falintil, diplomata sira no orienta, nune'e ita to'o 1999 referendum. ida ne'e mak Xanana Gusmão.

Entretantu asaun karitativa, iha suku katrai karaik no Lauana, eis komandante en xefe das FALINTIL, Kay Rala Xanana Gusmão distribui foos, supermi, semente no materiál konstrusaun nian ba komunidade sira.

Tempotimor (Dili) - Komandu Polisia Nasionál Timor-Leste (PNTL) liuhosi Komandu Munísipiu Dili hamutuk ho Ministériu Públiku (MP) hala'o serimónia entrega motorizada hamutuk 151, ne'ebé durante Polisia Unidade Tranzitu halo operasaun no prende, hodi entrega ba Diresaun Jerál Patrimóniu Estadu (DJPE) Ministériu Finansa hodi prosede tuir tuir prosedimentu halo leilaun.

Tempotimor (Dili) - Bazeia ba relatóriu anuál Organizasaun Mundiál ba kooperasaun dezenvolvimentu ekonomia hasai ona Timor-leste husi Estadu frajíl.

Ministru Prezidensia Konsellu Ministru, Fidelis Leite Magalhães hateten, tuir relatóriu anuál ba tinan 2020 nian, hasai ona Timor-Leste husi organizasaun mundiál ne'ebé halibur nasaun sira frajíl, tanba Timor-Leste metin no la'ós ona nasaun frajíl.

"Relatoriu ida husi OSD ba koperasaun dezenvolvimentu ekonomia, organizasaun mundiál ida ne'ebé fó sai sira-nia relatóriu anuál kona-ba pais sira ne'ebé frazil no sira nia relatoriu hasai ona Timor-Leste husi kategoria Estadu frajíl, tanba sira konsidera Timor-Leste la'os frajil", dehan nia, iha Palásiu Governu, Sesta (18/09).

Governante ne'e hatutan, esforsu hirak ne'ebé halo durante ne'e hetan rezultadu pozitivu, liuliu ba iha nivel institusional pás no estabilidade mak iha rekoñesimentu ida hasai tiha Timor-Leste husi kategoria Estadu frajíl.

Tanba ne'e, dezeja atu kontinua servisu makaas, nune'e tinan hirak tuir mai, Timor-Leste sei la konsidera hanesan Estadu frajíl.

"Estadu frajíl ne'e dehan, Estadu ne'ebé la metin ka frajíl komu hasai ona, entaun rekoñesimentu ida katak Timor-Leste iha melloramentu husi koñesimentu internasionál Timor-Leste Estadu ne'ebé metin to'o ninia instituisaun pás no estabilidade", tenik nia.

Nune'e, ba oin Estadu Timor-Leste halo esforsu hodi kontinua avansa iha dezenvolvimentu sosiu-ekonómiku no apela ba sidadaun hotu atu fó kontribuisaun ba hadi'a Timor-Leste ninia reputasaun iha mundu. (*)  

Tempotimor (Letefoho)-Durante viajen eis komandante en xefe das FALINTIL, Kay Rala Xanana Gusmão nian iha teritóriu nasionál hodi halo asaun karitativa no fo hanoin b povu kona ba pandemia Covid-19.

Kontinuasaun husi asaun ne’e, iha Katrai Karaik, loron sesta (18/9) iha ne’ebe hetan mos partisipasaun husi eis Prezidente Repúblika Dr. Jose Ramos Horta ne’ebe Ba ema lubuk bo’ot, eis representante especial CNRM ne’e katak, Xanana mak mesias no besi-asu Timor-Leste nian.

Tuir Horta, Xanana mak mesias, tanba mosu iha 1978, hafoin Nicolau Lobato mate iha kombate.

"Bainhira Nicolau Lobato mate, Komite Sentrál Fretilin (CCF sigla Portuges) mohu, Falintil rahun, ema barak hanoin funu hotu ona. Ami iha liur mós lahatene, se mak lider, tanba Nicolau Lobato mate ona iha gerilla, derepente mesias ida mosu iha Larigutu," dehan Horta iha nia dikursu iha komunidade Katrai Lauana nia oin, Sesta (18/9).

Horta relembra, Dom Martino informa katak, enkontru iha Larigutu mosu Xanana Gusmão.

"Agora presiza ema ida ho vontade hanesan besi-asu, tanba iha luta ne'e ema mate hotu, hamlaha, mundu la liga, se mak atu hahú fila fali, ema ne'ebé atu hahú fila fali, nia tenke iha, tenke iha don espesiál, ikus mai rreorganiza Fretilin, reorganiza Falintil, no fó esperansa ba povu, to'o ohin, nia (Xanana) nafatin," dehan Horta

Horta mós espresa nia sentimentu kontente iha komunidade Katrai Lauana nia oin, tanba hamutuk ho Xanana Gusmão tanba ne'e imi hotu rona mensajem husi Kay Rala Xanana Gusmão.

Xanana rekoñese, mosu hanesan mesias iha 1978, kaundu Nicolau Lobato mate ona iha kombate laran.

"Ohin maun Ramos mós dehan, sira iha liur rona katak, lahatene se mak atu organiza no reorganiza fali ka lae, to'o mosu Dom Martino, nia haruka ba liur katak, iha fali ona, organiza fali ona," nia dehan dehan Xanana.

Xanana mós dehan, hafoin reorganiza Fretilin, Falintin no fó esperansa ba povu, maibé ema balun iha liur dehan katak ha'u (Xanana) traidór.

"Maibé husi liur ema balun bolu ha'u dehan, ha'u traidór tanba ha'u reorganiza Fretilin, Falintil no povu, maibé ema balun dehan ha'u traidór, tanba ne'e iha 1986, ha'u sai husi Fretilin hodi lidera de'it Falintil no funu, hanesan ema bolu katak komandante ein xefe," dehan Xanana.

Tempotimor (Tiliomar)-Sekretariu Estadu Kooperativa Elizário Ferreira hatete nia prontu atu loke dalan hodi fasilita grupu feto sira atu asesu ba merkadu.