Formasaun ne'e realiza hafoin parte rua realiza asina akordu kooperasaun iha loron 02 fulan-marsu tinan 2021 ne'ebé foka liuba asuntu formasaun nian hodi hasa'e formadór sira-nia kuñesimentu kona-ba produsaun ninian.

Sekretáriu Estadu Kooperativa (SEKoop), Elizário Ferreira dehan, formasaun entre SEKoop ho LAPENKOP Indonézia ne'e, prioridade liuba formadór sira kona-ba área produsaun nian hodi eduka mós povu sira atu labele abandona rai mamuk.

“Formasaun ne'e fó ba formadór sira, liuliu ba produsaun sira, oinsá mak atu hala'o, atu eduka povu atu dezenovolve kooperativa iha espíritu ida haburas ka nakfilak ita-nia rai ba rai ida matak hodi kontribui ba produsaun rai laran nian, e bele mós iha inovativu hodi loke tan espasu ba produtu sira”, dehan SEKoop, Elizário ba www.tempotimor.com iha nia kna'ar-fatin Akait, segunda (29/03).

Akordu ho Lepenkop haree liuba asuntu tolu, mak formasaun no hala’o estudu komparativu ba nasaun Indonézia, maibé problema globál surtu Covid-19, nune'e sira realiza de'it formasaun hodi hasa'e kapasidade jestór no formadór nian.

"Ho Lapenkop ne'e, agora dadaun sei projeta iha formasaun tanba covid-19, entaun asuntu sira seluk ne'e ita seidauk bele ko’alia, estudu komparativu ho tan sira seluk ne'e, ita seidauk bele ko’alia tanba besik malu, e labele haree besik demais, tanba ida ne'e mak ita sei presiza tempu atu halo”, dehan nia.

Diretór Nasional Dezenvolvimentu Kooperativa (DNDK), Reinaldo Borges hatutan, formasaun ne'e sira realiza durante loron 10 ho área importante liu ne'ebé sira foti mak kooperativa produsaun ho matéria kontabilidade.

Matéria kontabilidade la'ós fásil no impossivel mós ba ema atu aprende de'it iha loron sanulu laran, sá tan atu halo implementasaun.

"Tanba akontabilidade ne'e la'ós dehan osan tama no osan sai de'it, ka hola sasán no fa’an sasán de'it, maibé iha prosedimentu lubuk ida. Tanba ida ne'e mak iha formasaun ne'e ami foku liuba kooperativa konsumu, kooperativa multi seitorial ho produsaun nian. Ida ne'e mak ami husu ba sira atu fó”, hatete Reinaldo iha Federasaun Hanai Malu (FHM), Lanud Bairro Pite.

Durante formasaun, oradór sira husi LAPENKOP nia introdusaun kona-ba matéria kooperativa, maioria hanesan de'it, maibé buat diferente mak kooperativa produsaun.

Partisipante sira iha formasaun ne'e hamutuk ema na'in-37, kompostu husi funsionáriu sira iha gabinete SEKoop, gabinete diresaun Jerál ba kooperativa nia laran.

Formasaun ne'e hala'o liuhusi zoom ka vídeokomferénsia durante loron sanulu hahú husi loron 18 no termina iha loron 27 fulan-marsu tinan ne'e.(*)